भारत । उत्तर प्रदेशको प्रयागराजमा जारी कुंभ मेलामा मंगलबार राती करिब डेढ बजे एक घाटमा भगदड भएको छ, जसमा कम्तिमा ३० जनाको मृत्यु भएको छ। यस दुर्घटनामा दर्जनौं घाइते पनि भएका छन्।

प्रशासनले शुरुमा मृतकको संख्याको बारेमा कुनै आधिकारिक बयान दिएको थिएन। तर पछि डीआईजी, महाकुंभ नगर मेला क्षेत्र, वैभव कृष्णले मिडियालाई जानकारी दिंदै भने, “महाकुंभमा भएको भगदडमा ३० जनाको मृत्यु भएको छ, जसमध्ये २५ जनाको पहिचान भइसकेको छ। ६० घाइतेको उपचार अस्पतालमा जारी छ।”

उनले घटनाको कारण बताउँदै भने, “अखाडा क्षेत्रमा बैरिकेड्स लगाइएको थियो। ती बैरिकेड्स टुटेपछि धेरै श्रद्धालुहरू घाटमा पुगे। ब्रह्म मुहूर्तको इन्तजार गर्दै घाटमा सुतेका श्रद्धालुहरूलाई अरू श्रद्धालुहरूले देख्न नसकेपछि यो दुर्घटना भयो।”

उत्तर प्रदेशका मुख्यमन्त्री योगी आदित्यनाथले दुर्घटनामा दुख व्यक्त गर्दै न्यायिक जाँच गराउने घोषणा गरे। उनले भने, “यो घटना मर्माहत गर्ने छ र यसबाट सबक लिनुपर्छ। हामी यसको न्यायिक जाँच गराउने छौं र न्यायिक आयोग गठन गरिनेछ। साथै, पुलिस स्तरमा पनि जाँच गराइनेछ। “उनले मृतकको आश्रितलाई २५-२५ लाख रुपैयाँ आर्थिक सहायता दिने घोषणा पनि गरे।
प्रधानमन्त्री नरेन्द्र मोदीले पनि एक्स (ट्विटर) मा यस घटनालाई दुखद बताउँदै मृतकको परिवारलाई संवेदना व्यक्त गरे। उनले लेखे, “प्रयागराज महाकुंभमा भएको दुर्घटना अत्यन्त दुखद छ। मैले मुख्यमन्त्री योगी आदित्यनाथसँग कुरा गरेको छु र राज्य सरकारसँग सम्पर्कमा छु।”