काठमाडौँ । बडा दसैँको आठौँ दिन आज महाअष्टमी पर्व देशभर शक्तिस्वरूपा नवदुर्गा भवानीको विशेष भक्तिआराधना गरी मनाइँदैछ । यस दिन महाकाली, महालक्ष्मी र महासरस्वतीको संयुक्त स्वरूपको पूजा गरिन्छ । महाअष्टमीका अवसरमा गुह्येश्वरी, भद्रकाली, नक्साल भगवती, शोभाभगवती, दक्षिणकाली तथा देशभरका प्रसिद्ध शक्तिपीठहरूमा बिहानैदेखि दर्शनार्थीहरूको लामो लाइन लागेको छ ।
महाअष्टमीको रात्रिलाई तान्त्रिक महत्त्व बोकेको कालरात्रि मानिन्छ । यस रात दसैँघर, कोतघर तथा शक्तिपीठहरूमा मध्यरातमा विशेष तान्त्रिक विधिबाट गुप्त पूजा, हवन तथा आराधना गरिन्छ । आसुरी शक्तिमाथि सत्य र दैवी शक्तिको विजयको कामना गर्दै कालरात्रिको अनुष्ठान सम्पन्न गर्ने परम्परा छ ।
यस अवसरमा विभिन्न मन्दिरहरूमा धार्मिक विधानअनुसार बलि तथा सात्विक रूपमा फलफूल, नरिवल र कुभिन्डो अर्पण गरी पूजाआजा गरिएको छ । दर्शनार्थीको सुरक्षा र सहजताका लागि शक्तिपीठहरूमा सुरक्षाकर्मी तथा स्वयंसेवक खटाइएको छ ।
सम्बन्धित शीर्षकहरु
