काठमाडौँ । बडा दसैँको नवौँ दिन आज महानवमी पर्व देशभर निष्ठा र भक्तिपूर्वक मनाइँदैछ । आज नवरात्रकी नवौँ देवी सिद्धिदात्रीको विशेष पूजाआराधना गरी कार्यसिद्धिको कामना गरिन्छ । महानवमीको मुख्य आकर्षणका रूपमा आज कलपूर्जा, औजार, मेशिनरी उपकरण, हातहतियार र सवारीसाधनहरूको आयुध पूजा भव्य रूपमा सम्पन्न गरिएको छ ।
यातायात व्यवसायी तथा सर्वसाधारणले बिहानै आफ्ना सवारीसाधन सफा गरी अबिर र फूलका मालाले सजाएर पूजाआजा गरेका छन् । यन्त्र र सवारीको पूजा गर्नाले दुर्घटनाबाट जोगिने र कार्यक्षेत्रमा उन्नति हुने धार्मिक विश्वास छ । हनुमानढोकास्थित कोतखानामा परम्परागत विधिअनुसार विशेष पूजा गरिएको छ भने तलेजु भवानी मन्दिर आज मात्र सर्वसाधारणका लागि खुला गरिएको छ ।
महानवमीसँगै भोलि मनाइने विजयादशमीका लागि टीका, जमरा र प्रसादको अन्तिम तयारी सुरु भएको छ ।
सम्बन्धित शीर्षकहरु
