काठमाडौँ । आश्विन शुक्ल प्रतिपदाका अवसरमा आज घरघरमा शास्त्रीय विधिपूर्वक कलश स्थापना गरी जमरा राखेसँगै नेपालीहरूको महान् चाड बडा दसैँ सुरु भएको छ । बिहानै पवित्र जलाशय तथा नदीबाट ल्याइएको शुद्ध माटो र बालुवामा जौ, मकै तथा गहुँका दाना छरेर जमरा राख्ने धार्मिक अनुष्ठान सम्पन्न गरिएको छ । यसैसँगै नौ दिनसम्म देवी दुर्गाका विभिन्न शक्तिको उपासना गरिने नवरात्रको औपचारिक थालनी भएको छ ।

नेपाल पञ्चाङ्ग निर्णायक विकास समितिले निर्धारण गरेको शुभ साइतमा दसैँघर तथा पूजाकोठामा घटस्थापना गरी दीप, कलश र गणेशको पूजा गरिएको छ । आजका दिन प्रथम देवी शैलपुत्रीको आराधना गर्दै दुर्गा सप्तशती पाठ आरम्भ गरिन्छ । आज रोपिएको जमरालाई नवमीसम्म जलसेचन गरी हुर्काइने र विजयादशमीका दिन देवीको महाप्रसादका रूपमा शिरमा धारण गर्ने मौलिक परम्परा रहेको छ ।

घटस्थापनासँगै राजधानीलगायत देशभरका प्रमुख शक्तिपीठहरूमा भक्तजनहरूको चहलपहल उल्लेख्य रूपमा बढेको छ । चाडपर्वलाई लक्षित गरी खाद्यान्न, लत्ताकपडा तथा पूजा सामग्रीको किनमेल गर्नेहरूको भीडले बजार क्षेत्रमा विशेष रौनक थपेको छ ।