काठमाडौं । एसीसी प्रिमियर कप क्रिकेटको सेमिफाइनलमा नेपालले कुवेतसँग खेल्ने भएको छ । हङकङलाई ३० रनले हराउँदै समूह बीको उपविजेता बनेर कुवेतले नेपालसँगको सेमिफाइनल भेट पक्का गरेको हो ।
नेपाल र कुवेतबीचको सेमिफाइनल खेल शनिबार त्रिवि क्रिकेट मैदान कीर्तिपुरमा हुनेछ । नेपाल आजै भएको खेलमा कतारलाई हराउँदै समूह एको विजेता बनेको थियो ।
कतारलाई हराउने क्रममा नेपालले बिर्सनलायक ब्याटिङ गरेको थियो । टस हारेर ब्याटिङको निम्तो पाएको नेपालले १ सय १२ रन बनाउँदा ९ विकेट गुमाएको थियो ।
अन्तिम विकेटका लागि सन्दीप लामिछाने र ललित राजबंशीले ४५ रनको साझेदारी गरेपछि नेपालले हेर्न लायक रन बनाएको थियो ।
खराब ब्याटिङ गरेपनि नेपालले उत्कृष्ट बलिङ देखाएपछि कतारमाथि ६८ रनको जित निकाल्यो । नेपालका सन्दीप लामिछाने ५, सोमपाल कामी ३ र ललित राजवंशीले २ विकेट लिएका थिए ।
अर्को सेमिफाइनलमा यूएई र ओमानले शनिबार नै खेल्ने छन् । कुवेतले हङकङलाई हराएपछि यूएई समूह बीको विजेता बनेको हो ।
प्रतियोगितामा राम्रो सुरुवात गरेको हङकङ भने अन्तिम खेलमा हारपछि समूह चरणबाटै बाहिरिएको छ । फाइनल पुग्दै उपाधि जित्ने टिम आगामी सेप्टेम्बरमा हुने एसिया कपमा छनोट हुनेछ ।
सम्बन्धित शीर्षकहरु
