काठमाडाैं । डेनमार्क युरोकप फुटबलको नकआउट चरणमा प्रवेश गरेको छ । सोमबार राति भएको खेलमा रुसलाई ४-१ गोल अन्तरले पराजित गरी डेनमार्क अन्तिम १६ मा पुगेको हो ।

पार्केन स्टेडियममा डेनमार्कलाई जित दिलाउन मिकेल डाम्सगार्ड, युसुफ पाउलसेन, आन्द्रेस क्रिस्टियनसेन र जोकिम मुहलेले एक एक गोल गरे । रुसका आर्टम ज्यूबाले एक गोल फर्काए ।

खेलको ३८ औं मिनेटमा डाम्सगार्डले गोल गर्दै डेनमार्कलाई अग्रता दिलाएका थिए । त्यसपछि ५९ औँ मिनेटमा पाउलसेनले गोल गर्दै डेनमार्कको अग्रता २-० बनाए । ७० औँ मिनेटमा आर्टमले पेनाल्टीमा गोल गर्दै रुसलाई २-१ को स्थितिमा ल्याए ।

त्यसपछि पुन: ७९ औं मिनेटमा क्रिस्टियनसेनले र ८२ औँ मिनेटमा जोकिमले गोल गरी डेनमार्कलाई ४-१ को जित दिलाए । पराजित रुस भने समूह चरणबाट बाहिरिएको छ ।