इटालियन सिरी ए फुटबलमा युभेन्टस पराजित भएकाे छ । मंगलबार राति भएको खेलमा उपाधी होडमा रहेको शीर्ष स्थानको युभेन्टस एसी मिलानसँग पराजित भएकाे हाे ।
युभेन्टस मिलानसँग ४-२ गाेलले पराजित भएकाे हाे ।
पहिलो हाफमा दुवै तर्फबाट गोल हुन सकेन । तर दोस्रो हाफको सुरुवातमा नै युभेन्टसले लगातार २ गोल गरी अग्रता लियो । युभेन्टसका लागि ४७ औँ मिनेटमा साबिओतले गोल गरी सुरुवाति अग्रता दिलाएका थिए । त्यसपछि ५३ औँ मिनेटमा क्रिष्टियानो रोनाल्डोले गोल गरी अग्रता दोब्बर पारे । तर युभेन्टसले त्यसलाई जाेगाउन सकेन ।
६२ औं मिनेटमा मिलानले पेनाल्टी पायो । भीएआरको सहयोगमा पाएको पेनाल्टी ज्लाटन इब्राहिमोविचले गोलमा परिणत गरे । ६६ औं मिनेटमा इब्राहिमोविचको पासमा फ्रांक केस्सीले गोल गरी खेल बराबरीमा पुर्याए ।
६७ औं मिनेटमा मिलानले अग्रता लियाे । उसका लागि राफायल लिआओले गोल गर्न सफल भए । त्यसपछि ८० औं मिनेटमा मिलानका लागि रेविचले गोल गरी ४-२ काे जित दिलाए ।
जितपछि ३१ खेलबाट ४९ अंकसहित एसी मिलान पाँचौँ स्थानमा पुगेको छ । पराजित भएको शीर्ष स्थानमा रहेको युभेन्टसको ३१ खेलबाट ७५ अंक छ ।
सम्बन्धित शीर्षकहरु
