नेपाल स्टक एक्स्चेन्ज (नेप्से) ले अब बजारमा कारोबार हुने सेयरको अन्तिम मूल्य निर्धारण भारित औसत मूल्यका आधारमा गर्ने भएको छ। नयाँ प्रणालीअनुसार, अन्तिम १५ मिनेटको कारोबार मूल्यको भारित औसत नै सो कम्पनीको अन्तिम मूल्य रहनेछ। यसका लागि नेप्सेले प्राविधिक तयारी तीव्र बनाएको छ।
हालसम्म सेयर बजार बन्द हुँदा अन्तिम पटक कारोबार भएको मूल्य नै त्यस दिनको अन्तिम मूल्य मानिँदै आएको थियो। तर, केही सेयर कारोबारकर्ताले अन्तिम एक मिनेटमै मूल्य हेरफेर गरी कृत्रिम उतार-चढ़ाव सिर्जना गर्ने गरेको आरोप लागेपछि नेप्सेले नयाँ नियम लागू गर्न लागेको हो।
नेपाल धितोपत्र बोर्डले यसका लागि नीतिगत स्वीकृति प्रदान गरिसकेको छ। प्रवक्ता मुराहरि पराजुलीका अनुसार नेप्सेले केही साताभित्रै यो प्रणाली लागू गर्ने तयारी गरिरहेको छ। विशेष गरी, लोक्याप कम्पनीहरूमा अन्तिम एक मिनेटमा मूल्य कृत्रिम रूपमा बढाउने वा घटाउने अभ्यास रोक्न नयाँ नियम ल्याइएको बताइएको छ।
वर्तमान अवस्थामा, सेयर मूल्य दिनभर १० प्रतिशतसम्म घटेको वा बढेको भए पनि अन्तिम एक मिनेटमा ठूला लगानीकर्ताले हस्तक्षेप गरी उल्टो १० प्रतिशतको सीमासम्म पुर्याउने गरेका छन्। यसले भोलिपल्टको सुरुआती कारोबार मूल्यमा समेत असर पार्ने गरेको छ।
अबदेखि, अन्तिम १५ मिनेट अर्थात् दिउँसो २:४५ देखि ३:०० बजेसम्मको कारोबारको भारित औसत मूल्यलाई अन्तिम मूल्य मानिनेछ, जसले बजारमा चलखेल रोक्न मद्दत गर्ने नेप्सेले विश्वास लिएको छ।
सम्बन्धित शीर्षकहरु
