नेको इन्स्योरेन्स कम्पनी लिमिटेड (NIL) ले आज (फागुन ८ गते) देखि हकप्रद सेयर निष्कासन तथा बिक्री खुला गरेको छ। कम्पनीले हाल कायम चुक्ता पूँजीको २५ प्रतिशत अर्थात् ४ कित्ताको अनुपातमा १ कित्ता नयाँ सेयर जारी गरेको हो।

यस अनुसार, नेको इन्स्योरेन्सले प्रतिकित्ता १०० रुपैयाँ अंकित मूल्यका ५० लाख ३० हजार ९०१.५५ कित्ता हकप्रद सेयर निष्कासन गर्दैछ। यस प्रयोजनका लागि कम्पनीले माघ १८ गते बुक क्लोज गरिसकेको छ। माघ १५ गतेसम्म नेप्सेमा कारोबार भई कायम रहेका सेयरधनीहरूले फागुन २८ गतेसम्म आवेदन दिन सक्नेछन्।

इन्फोमेरिक्स क्रेडिट रेटिङ नेपालले नेको इन्स्योरेन्सलाई ‘आईआरएन सिंगल ए प्लस’ इस्यूअर रेटिङ प्रदान गरेको छ, जसले कम्पनीको वित्तीय दायित्व बहन गर्ने क्षमतालाई सुरक्षित देखाउँछ।

नेको इन्स्योरेन्सको हकप्रद सेयर निष्कासन तथा बिक्री प्रबन्धक सानिमा क्यापिटल लिमिटेड रहेको छ। सेयरधनीहरूले बिक्री प्रबन्धक, नेको इन्स्योरेन्सका केन्द्रीय तथा क्षेत्रीय कार्यालयहरू, आस्वा सेवामा सहभागी बैंक तथा वित्तीय संस्थाहरू तथा ‘मेरो सेयर’ सफ्टवेयरमार्फत अनलाइन आवेदन दिन सक्नेछन्।

हाल नेको इन्स्योरेन्सको चुक्ता पूँजी २ अर्ब १ करोड २३ लाख ६० हजार ६१९ रुपैयाँ रहेको छ। हकप्रद निष्कासन तथा बाँडफाँटपश्चात चुक्ता पूँजी २ अर्ब ५१ करोड ५४ लाख ५० हजार ७७४ रुपैयाँ पुग्नेछ।