Aafno Khabar
suvakamana add

विद्यालय जान सामुदायिक विद्यालयका शिक्षकलाई सरकारको आग्रह

  • आफ्नो खबर
  • २०७७ आश्विन ११ गते प्रकाशित

काठमाडौं । वैकल्पिक विधिको सिकाइ शिक्षकको सक्रियतामा निर्भर रहने भएकोले सरकारले तत्काल आफू सेवारत विद्यालयमा पुग्न सामुदायिक विद्यालयका शिक्षकलाई आग्रह गरेको छ ।

शिक्षा, विज्ञान तथा प्रविधि मन्त्री गिरिराजमणि पोखरेलले शिक्षककै वरिपरि रहेर वैकल्पिक विधिको सिकाइ अगाडि बढ्ने भएकोले शिक्षकहरू तत्काल विद्यालयमा पुग्नुपर्ने बताउनुभयो ।

शिक्षा पत्रकार समाजले आयोजना गरेको भर्चुअल संवादमा मन्त्री पोखरेलले शिक्षकको कोरोना भाइरस बीमा गरिएको स्पष्ट गर्दै सम्बद्ध जिल्ला प्रशासन कार्यालयसँग समन्वय गरी शिक्षकहरू तत्काल विद्यालयमा पुग्नुपर्ने बताउनुभयो ।

शिक्षक विद्यालयमा नपुगेसम्म वैकल्पिक विधिको सिकाइ सफल हुन नसक्ने उहाँको भनाइ छ । अभिभावकसँग सम्पर्क कायम गरी सिकाइ सहजीकरण निर्देशिका र विद्यालय शिक्षासम्बन्धी आकस्मिक कार्ययोजनाको कार्यान्वयनमा जुट्न उहाँले आह्वान गर्नुभयो ।

सरकारले न्यूनतम शुल्क लिन सक्ने गरी निजी विद्यालयलाई बाटो खोलिदिएको स्पष्ट गर्दै मन्त्री पोखरेलले स्थानीय तहसँगको समन्वयमा शुल्कको विषय कार्यान्वयनमा ल्याउन आग्रह गर्नुभयो । न्यूनतम सिकाइको सुनिश्चितता गर्दै समयमै शैक्षिक सत्रको सदुपयोग गर्ने योजना रहेको उहाँले जानकारी दिनुभयो ।