Aafno Khabar

रोकिएन सुन तस्करी

  • टेकराज थामी
  • २०७५ असार १८ गते ०१:३५ प्रकाशित

नागढुंगाबाट ९ केजी सुन बरामद

प्रहरीले उपत्यका भित्रिने मुख्य नाका नागढुंगाबाट ९ किलो सुन बरामद गरेको छ । आइतबार ६ केजी र शनिबार ३ केजी सुन बरामद भएको हो ।

आइतबार सुनसहित सिन्धुपाल्चोकका २३ वर्षीय तेन्जिङ तामाङ पक्राउ परेका छन् । धादिङ हुँदै काठमाडौं आउँदै गरेको बा.९५प ८१६४ नं. को पल्सर मोटरसाइकल जाँच गर्दा सुन भेटिएको थियो ।

महानगरीय प्रहरी प्रभाग नागढुंगाबाट खटिएका प्रहरी निरीक्षक केशव भट्टको टोलीले आइतबार साँझ ७ बजे सुन बरामद गरेको हो । प्रहरीका अनुसार तामाङले विशेष खालको पेटीको फल्स बटमभित्र सुन लुकाई काठमाडौं ल्याउँदै थिए ।

महानगरीय प्रहरी परिसर काठमाडौंका प्रवक्ता डिएसपी मोहन थापाका अनुसार विशेष सूचनाका आधारमा उक्त सुन बरामद गरिएको हो । ‘उपत्यकाभित्र सुन आउँदै छ भन्ने सूचना प्राप्त भयो ।

प्रहरीले जाँच कडा बनायो । यही क्रममा केही सवारीसाधन हाम्रो निगरानीमा थिए । जाँच गर्ने क्रममा सुन बरामद भयो,’ उनले भने ।

प्रहरीका अनुसार उक्त सुन रसुवाको केरुङ नाका हुँदै भित्रिएको हो । जुन, त्रिशूलीबाट धादिङ हुँदै काठमाडौं ल्याइँदै थियो । ‘हामी अनुसन्धानकै चरणमा छौँ ।

सुन रसुवाबाट काठमाडौं ल्याउँदै गरिएको भन्ने खुलेको छ । यस क्रममा एक पक्राउ परेका छन् । घटनामा अन्य पनि संलग्न हुन सक्ने अनुमान छ । खोजी भइरहेको छ,’ प्रहरी परिसर काठमाडौंका प्रमुख एसएसपी विश्वराज पोखरेलले भने ।

शनिबार मात्रै प्रहरीले सोही नाकाबाट ३ केजी सुनसहित पाँचजनालाई पक्राउ गरेको थियो । भारत उत्तराखण्ड चम्पावत थाना टनकपुर नयाँबस्तीका ४५ वर्षीय अशोक कुमार, २५ वर्षीय सन्जना साह, ५९ वर्षीय चन्द्रमोहन जोशी, १९ वर्षीय दीपककुमार मौर्य र कञ्चनपुर भीमदत्त–६ वनगाउँका २३ वर्षीय मनोज विक पक्राउ परेका छन् । बरामद सुन अशोक, सन्जना र चन्द्रमोहनको रहेको प्रहरीको भनाइ छ ।

यसअघि शुक्रबार वीरगन्ज–१६ शंकराचार्य गेटनजिकबाट एक केजी सुन बरामद भएको थियो । सुनसहित सर्लाही हरिपुर–९ का ३८ वर्षीय सन्तोषकुमार साह पक्राउ परेका थिए ।

रोकिएन सुन तस्करी

साढे ३३ केजी सुन र सनम शाक्य हत्या अनुसन्धानका लागि गठित सरकारी उच्चस्तरीय छानबिन समितिको अनुसन्धानले पनि तस्करलाई खासै प्रभाव नपरेको देखिएको छ ।

नेपाल प्रहरीका पूर्वडिआइजी हेमन्त मल्लले नेपालमा सुन तस्करी गर्ने ठूलो गिरोह रहेको, तर त्यसमा अनुसन्धान पुग्नै नसकेकाले तस्करीले निरन्तरता पाएको बताए । उनले भने, ‘सरकारबाट गठित छानबिन समितिको अनुसन्धान दायरा सिमित छ ।

यसले एउटा मात्रै घटनालाई लिएर अनुसन्धान गर्नु स्वाभाविक हो । त्यो आवश्यक पनि छ । तर, यहाँ तस्कर धेरै छन् । जहाँ न प्रहरीको अनुसन्धान पुग्न सकेको छ, न अनुसन्धान समितिको नै ।

त्यसैले यस्ता तस्करी निरन्तर चलिरहेको छ । यसको अर्थ कहीँ न कहीँ पक्कै लुपहोल छ । अब अनुसन्धान त्यसतर्फ केन्द्रित हुनुपर्छ । जहाँ अहिलेसम्म सोच्नै सकिएको छैन ।’

तस्करीको ‘ट्रेन्ड’ एउटै

नागढुंगामा शनिबार ३ केजी सुनसहित पाँच पक्राउ परे । शुक्रबार वीरगन्ज–१६ शंकराचार्य गेट सामुन्नेबाट एक केजी सुन बरामद भयो ।

२ जेठमा धनगढीको गड्डाचौकी नाका हुँदै भारत जान लागेको एचआर १२ एएफ ००६ नं. को गाडीमा ४९६ ग्राम सुनसहित भारत हरियाणाका जितेन्द्र सैनी पक्राउ परे ।

डेढ महिनायता सुन बरामदको ‘ट्रेन्ड’ हेर्दा ‘ट्रान्जिट’का रूपमा प्रयोग हुने स्थान फरक–फरक देखिए पनि गन्तव्य भने एउटै देखिन्छ । गन्तव्य त्यही हो, जहाँ त्रिभुवन अन्तर्राष्ट्रिय विमास्थल हुँदै तस्कर भएको भनिएको साढे ३३ केजी सुन पुगेको थियो ।

नागढुंगामा बरामद तीन किलो सुनको बिस्कुटमा लगाइएको संयुक्त अरब इमिरेट्स (दुबई)को छापले अर्को के पुष्टि गर्छ भने साढे ३३ केजी सुन जहाँबाट नेपाल ल्याइएको थियो, नागढुंगामा बरामद तीन किलो सुन पनि त्यहीँबाट ल्याइएको हो । अर्थात् शनिबार बरामद ३ किलो सुन र साढे ३३ केजी सुनका तस्कर एउटै हुन् ।

यो तथ्यलाई नेपाल प्रहरीका पूर्वडिआइजी हेमन्त मल्ल पनि स्विकार्छन् । उनी भन्छन्, ‘सरकारले गरेको यति ठूलो अनुसन्धानपछि पनि तस्करी रोकिएको छैन । यसर्थ यसको जड अन्यत्रै छ ।

जहाँ हामी पुग्नै सकेका छैनौँ । पछिल्ला दिनमा बरामद सुन र तस्कर भएको भनिएको साढे ३३ केजी सुनको गन्तव्य र स्रोत एउटै हुनु संयोग मात्रै होइन । अब यसतर्फ अनुसन्धान केन्द्रित हुन जरुरी छ ।’