भक्तपुर— नेपाली कांग्रेसका महामन्त्री गगन कुमार थापाले वर्तमान प्रधानमन्त्रीभन्दा राम्रो सरकार सञ्चालन गर्ने क्षमता कांग्रेसमा रहेको दाबी गरेका छन्। आइतबार मीनकुमारी राणा प्रतिष्ठानले भक्तपुरमा आयोजना गरेको कार्यक्रममा उनले प्रधानमन्त्री बन्ने अवसर पाए कुशलतापूर्वक देश चलाउन सक्ने बताएका हुन्।
“आजको प्रधानमन्त्री, अघिल्लो वा हुनेवाला प्रधानमन्त्री सबैभन्दा राम्रो काम गरेर देखाउन सक्छौँ भन्ने विश्वास छ। अहिलेको प्रधानमन्त्रीको ठाउँमा आजै साँझ मलाई वा हामीहरूमध्ये कसैलाई प्रधानमन्त्री बनाइयो भने पनि योभन्दा राम्रो सरकार चलाउँछौँ,” उनले दाबी गर्दै भने।
थापाले अर्को विकल्प वा व्यवस्थाको बहसमा दश वर्ष खेर जान नदिनुपर्नेमा जोड दिए। उनले निर्वाचनमा दलहरू जित्न-हार्नु स्वाभाविक भएकाले यसलाई सहज रूपमा स्वीकार्नुपर्ने धारणा राखे।
उनले मन्त्री वा प्रधानमन्त्री बन्नु ठूलो कुरा नभए पनि नेतृत्वको परिवर्तनले देशलाई सही दिशामा लैजान सक्ने बताए। “हामीलाई अवसर दिइयो भने अहिलेको सरकारभन्दा राम्रोसंग देश चलाउन सक्छौँ,” उनले थपे।
कांग्रेसले २०८४ सालको चुनाव कुर्दै बस्न नहुने र अहिले उपलब्ध अवसरलाई सदुपयोग गरी देश र जनताको हितमा काम गर्नुपर्नेमा थापाले जोड दिए।
सम्बन्धित शीर्षकहरु
