काठमाडौं । महोत्तरीको पिपरा गाउँपालिकाका एक महिनादेखि ओछ्यानसहित बेपत्ता झा दम्पतीको शव फेला परेको छ । महोत्तरीको पिपरा गाउँपालिका–२ मा गाडिएको अवस्थामा उनीहरूको शव हिजो फेला परेको प्रहरीले जनाएको हो ।
प्रदेश २ प्रहरी कार्यालयका प्रमुख प्रहरी नायब महानिरीक्षक धिरज प्रताप सिंहका अनुसार झा दम्पती को घर भन्दा ३ किलो मिटर दक्षिण तर्फ ५ फिट को खाल्डोमा गाडिएको अवस्थामा फेला परेको शव हराइरहेका झा दम्पतीकै भएको बताउनुभयो ।
शव चाँडो कुहियोस् भनेर नुन समेत हालेको पाइएको पनि जनाइएको छ । दम्पतीको शब मृतकका छोरा र भतिजाले सनाखत गरेको प्रहरिले बताएको छ । गत फागुन १० गते महोत्तरीको पिपरा गाउँपालिकास्थित सहोडवाबाट ६५ वर्षीय मोसाफिर झा र उनकी पत्नी ६० वर्षीया गीतादेवी झालाई घरमै सुतिरहेको अवस्थामा ओछ्यानसहित वेपत्ता पारिएको थियो ।
बेपत्ता भएका दम्पत्ति अपहरण अभियोगमा प्रहरीले यसअघि चार जनालाई पक्राउ गरेर सार्वजनी समेत गरिसकेको छ । पक्राउ पर्नेमा पिपरा गाउँपालिका ५, सहोडवाका ५२ वर्षिय रामबाबु यादव, उनकै २६ वर्षिय छोरा सुरेन्द्र यादव, कान्छो छोरो राजेन्द्र यादव र भारत मधुवनी जिल्ला मधवापुरका हरेन्द्र ठाकुर छन् ।
जिल्ला प्रहरी कार्यालय महोत्तरीले लामो समयसम्म बेपत्ता दम्पत्तिको अवस्था सार्वजनिक गर्न नसकेपछि सीआइबीले अनुसन्धान थालेको २ दिनमै चारै जनालाई घटनामा संलग्न रहेको आशंकामा पक्राउ गरी सार्वजनिक गरेको थियो । घटनाबारे थप अनुसन्धान भइरहेको प्रहरीले जनाएको छ ।
सम्बन्धित शीर्षकहरु
