रुपन्देही । सिद्धार्थ राजमार्गअन्तर्गत बुटवल–तानसेन सडक पहिरोका कारण अवरुद्ध भएको छ । तानसेन नगरपालिका–८ मा पर्ने गौडेपुल नजिकै शुक्रबार राति खसेको पहिरो दुई दिन लगाएर पन्छाएर एकतर्फी सवारी साधन चल्ने व्यवस्था गरिए पनि आइतबार साँझ खसेको पहिरोका कारण बाटो फेरी अवरुद्ध भएको हो ।

सोमबार बिहानैबाट पहिरो पन्छाउने काम शुरु भएको रुपन्देही प्रहरीले जनाएको छ ।शुक्रबार रातिदेखि रोकिएका सबै साधन पहिरो खसेको ठाउँ पार गरेर गन्तव्यतर्फ जान नपाउँदै पुनः सडक अवरुद्ध भएपछि सवारी साधनहरु फेरि सडकमै अलपत्र परेका छन् ।

शुक्रबार खसेको पहिरोले राजमार्गको बेसलाइन नै बगाएको छ । पहिरोले लु १ क ११७५ नम्बरको ट्रकसमेत पुरेको थियो । पहिरोले पुरेको ट्रकलाई शनिबार निकालिएको थियो ।