नेपाल आयल निगमले पेट्रोलको मूल्य बढाएको छ भने डिजेल र मट्टीतेलको मूल्य घटाएको छ। निगमले पेट्रोलमा प्रतिलिटर एक रुपैयाँ बढाएर नयाँ मूल्य लागू गरेको हो, जसअनुसार पहिलो वर्गका क्षेत्रमा पेट्रोलको मूल्य १६५.४० रुपैयाँ, दोस्रो वर्गका क्षेत्रमा १६७ रुपैयाँ र तेस्रो वर्गका क्षेत्रमा १६८ रुपैयाँ पुगेको छ।

त्यस्तै, डिजेल र मट्टीतेलको मूल्य प्रतिलिटर ४ रुपैयाँले घटाइएको छ। नयाँ मूल्यअनुसार पहिलो वर्गका क्षेत्रमा यसको मूल्य १५३.५० रुपैयाँ, दोस्रो वर्गका क्षेत्रमा १५५ रुपैयाँ र तेस्रो वर्गका क्षेत्रमा १५६ रुपैयाँ तोकिएको छ।

निगमका अनुसार पहिलो वर्गमा चारआली, विराटनगर, जनकपुर, अमलेखगञ्ज, भलवारी, नेपालगञ्ज, धनगढी र वीरगञ्ज डिपो समेटिन्छन्। दोस्रो वर्गमा सुर्खेत र दाङ रहेका छन् भने तेस्रो वर्गमा काठमाडौं, पोखरा र दिपायल परेका छन्। नयाँ मूल्य आज राति १२ बजेदेखि लागू हुनेछ।