काठमाडौं । गत आइतबार बिहान गोंगबु क्षेत्रमा सुटकेसभित्र हात खुट्टा काटिएको अवस्थामा टाउको बिनाको शरीर फेला पर्याे । शवको टाउको नभएका कारण हत्या भएका व्यक्ति को हुन् भनेर थाहा पाउन सकिएन ।
त्यसपछि प्रहरीले तालिमप्राप्त कुकुरको सहायतामा हत्या भएको व्यक्तिको टाउको र खुट्टा फेला पार्याे। टाउको भेटिएपछि प्रहरीले हत्या भएको व्यक्तिको पहिचानका लागि तस्बिर सार्वजनिक गर्याे । तस्बिर सार्वजनिक भएपछि हत्या भएका व्यक्तिको पहिचान खुल्यो ।
हत्या भएका व्यक्ति रोल्पाको कृष्णबहादुर बोहोरा भएको खुल्न आयो । उनका मामाले शवको पहिचान खुलाएका थिए । सोमबार बिहान शव सनाखत भएपछि प्रहरीले हत्या भएको घर पनि पत्ता लगायो । त्यसको केही समयपछि सोमबार साँझ प्रहरीले हत्यामा संलग्न पनि पक्राउ गर्न सफल भयो ।
कसले गर्याे हत्या ?
बोहोराको हत्या अभियोगमा प्रहरीले चितवनबाट एक महिला पक्राउ गर्याे । पक्राउ परेकी महिला कल्पना मुडभरी (पौडेल) थिइन् । उनी चितवन जिल्ला कालिका नगरपालिका वडा नं ७ घर भइ हाल काठमाडौं टोखा नगरपालिका वडा नं १० नवज्योति मार्ग बस्ने गरेको प्रहरीको विवरणमा उल्लेख छ ।
सोमबार उनलाई प्रहरीले चितवन कालिका नगरपालिकामा रहेको उनको माइतीबाट पक्राउ गरेको हो । पक्राउ परेपछि उनले बोहोराको हत्या अभियोग स्वीकार गरेकी थिइन् ।
३७ वर्षकी कल्पना पेशाले गृहिणी हुनुकासाथ केही टेलिश्रृंखलामा अभिनयसमेत गरेको अनुसन्धानका क्रममा खुल्न आएको छ । प्रहरीको विवरणअनुसार मृतक र अभियुक्त कल्पनाबीच फेसबुकमार्फत करिब तीन चारवर्ष अघि चिनाजानी भएको खुलेको छ ।
यसरी भएको थियो हत्या
हत्याको घटना गएको शनिबार राति ८ देखि १० बजेको बीचमा भएको खुल्न आएको प्रहरीले जनाएको छ ।
हत्या गर्नुअघि कल्पना र कृष्णले दही च्यूरा, रक्सी मासु खाएको र त्यसपछि हत्या गरेको कल्पनाले स्वीकार गरेकी छिन् । प्रहरीसँगको बयानमा कल्पनाले नसालु पदार्थका पाँच वटा ट्याब्लेट मिसाएर खुवाएपछि बेहोस भएका कृष्णबहादुरको अण्डकोषमा प्रहार गरेको बताएकी छिन् । कृष्णबहादुर बेहोस भएपछि सलले टाउको समातेर घाँटी थिचि हत्या गरेको र हत्या भइसकेपछि शव व्यवस्थापनमा लागेकी थिइन् ।
शव व्यवस्थापनका लागि उनले भान्छामा रहेको हतियारले टाउको र खुट्टा काटी शरीर सुटकेसमा राखेर बाहिर फालेको बताएकी छिन् । यी सब घटना हुँदा छोराछोरीले भने थाहा पाएका थिएनन् । हत्या आफू एक्लैले गरेको भए पनि शव व्यवस्थापनका क्रममा भने उनले छोरीको सहयोग लिएको देखिएको छ ।
एम्बुलेन्समा चितवन
घटना भएपछि उनले छोराछोरी दुवै लिएर चितवन गएकी थिइन् । शनिबार राति हत्या भएपछि आइतबार बिहान शव भेटिएको थियो । शव भेटिएपछि प्रहरीको आवत जावत बाक्लो भयो । जब प्रहरीले कुकुरको सहयोगमा अनुसन्धान सुरु गर्यो उनी आत्तिएको प्रहरीसँगको बयानमा उनले बताएकी छिन् ।
चितवनबाट बिरामी लिएर आएको एम्बुलेन्सका चालक चिनजानको आधारमा एम्बुलेन्समा आइतबार बेलुका छोरा छोरीसहित उनी चितवन गइन् । उनले शुक्रबार नै घरबेटीलाई माइत जाने जानकारी गराएकी थिइन् ।
हत्याको कारण
कृष्णबहादुरले आफूमाथि यौन दुर्व्यवहार गर्ने गरेको तथा आफ्नो तस्बिर राखेर फेक फेसबुक आइडी बनाएर दुःख दिने गरेको दाबी कल्पनाको छ ।
बोहोराले आफ्नी छोरीमाथि पनि आँखा लगाएकाले र बोहोराको क्रियाकलापबाट आजित भएपछि योजना नभए पनि हत्या गरेको कल्पनाले बयानमा उल्लेख गरेको प्रहरीले जनाएको छ ।
सम्बन्धित शीर्षकहरु
