Aafno Khabar

कष्टपूर्ण रह्यो डा. केसीको १५औँ अनशनको पहिलो रात

  • मानदत्त रावल
  • २०७५ असार १७ गते ०७:१७ प्रकाशित

डा. गोविन्द केसी १५ औँ पटक अनशन बसेका छन् । कर्णाली स्वास्थ्य विज्ञान प्रतिष्ठान शिक्षण अस्पताल जुम्लामा अनशन बस्ने योजना बनाएर आएका डा. केसीलाई जुम्ला प्रशासनले निषेध गरेपछि जिल्ला खेलकुद विकास समितिको कभर्ड हलमा अनसन बसेका हुन् ।

बिजुली, पानी, शौचालय समेतको व्यवस्था नभएको ठाउँमा अनशन बस्दा डा.केसीले पहिलो रात कष्टपूर्ण रुपमा बिताए । उनका भाइ किशोर केसीले भने, ‘बत्ति छैन, अध्यारोमा बस्न निकै कठिन भयो दियालोले रात काट्नु पर्यो ।’ अनशन स्थलमा विजुली बत्तिको व्यवस्था गरिदिन उनले माग गरे । ‘कभर्ड कलमा पानी चुहिन्छ, चिसो बढेको छ, लुगा कपडाको व्यवस्था पनि छैन, डा. केसीलाई जाडोले समस्या बनायो’ उनले भने, ‘यस्तै अवस्था रहे उहाँको स्वास्थ्यमा छिट्टै समस्या आउने छ ।’

डा. केसी अनशन बस्न लाग्दा शनिबार दिउँसो जिल्ला प्रशासन कार्यालय जुम्ला परिसरबाट प्रहरीले पक्राउ गरेको थियो । पक्राउपछि प्रहरी हिरासतमै अनशन सुरु गर्दा प्रहरीले कभर्ड हलमा लगेर छोडेको थियो ।

जिल्ला प्रशासन कार्यालय जुम्लाले कर्णाली स्वास्थ्य विज्ञान प्रतिष्ठान शिक्षण अस्पताल जुम्ला, जिल्ला प्रशासन कार्यालय र जिल्ला प्रहरी कार्यालयको दुई सय मिटर वरपरसम्म अनशन गर्न नदिने भन्दै निषेधित क्षेत्र घोषणा गरेको छ । डा. केसीको समर्थनमा जिल्ला स्थित नागरिक समाज, युवाहरु रहेका छन् ।

कम्तीमा बोल्न र अनशन बस्न देऊ !