काठमाडौँ । प्रमुख राजनीतिक दलहरूले काठमाडौंको तीनकुने क्षेत्रमा शुक्रबार भएको हिंसात्मक घटनाका मुख्य जिम्मेवार पूर्वराजा ज्ञानेन्द्र शाह भएको निष्कर्ष निकालेका छन्। उनीहरूले पूर्वराजाको निर्देशनमा हिंसात्मक गतिविधि भएको भन्दै दोषीमाथि कडा कारबाही गर्न सरकारलाई आग्रह गरेका छन्। संविधान र गणतन्त्र पक्षधर दलहरूले पछिल्लो घटनाक्रमको समीक्षा गर्दै सर्वदलीय बैठक बोलाउने तयारीसमेत गरेका छन्।
शनिबार बसेको नेपाली कांग्रेस पदाधिकारी बैठकले राजावादी समूहको आन्दोलन हिंसात्मक र अराजक भएको निष्कर्ष निकाल्दै पूर्वराजाको संलग्नतामा शंका गर्न नसकिने जनाएको छ। प्रवक्ता प्रकाशशरण महतका अनुसार पूर्वराजाकै निर्देशनमा हिंसा भड्काइएको निष्कर्षसहित सरकारले अनुसन्धान अघि बढाउनुपर्ने माग बैठकमा उठाइएको छ।
सत्तारूढ एमालेले पनि घटनाका मुख्य योजनाकार पूर्वराजा भएको आरोप लगाउँदै संलग्न सबैलाई कानुनी कारबाहीको दायरामा ल्याउनुपर्ने बताएको छ। उपमहासचिव प्रदीप ज्ञवालीले यो कुनै राजनीतिक घटना नभई आपराधिक गतिविधि भएको बताउँदै संविधान र गणतन्त्रको पक्षधर सबै दलहरू एकजुट हुनुपर्ने आवश्यकता औंल्याए।
एमाले महासचिव शंकर पोखरेलले हिंसात्मक घटनामा संलग्न र निर्देशन दिने सबैलाई कानुनी कारबाही गर्नुपर्ने माग गर्दै सामाजिक सञ्जालमार्फत सरकारलाई कडा कदम चाल्न आग्रह गरे। उनले आन्दोलनका नाममा नियोजित आपराधिक गतिविधि सञ्चालन गर्ने समूहविरुद्ध सरकारले ठोस कदम चाल्नुपर्ने बताए।
माओवादी केन्द्रका अध्यक्ष पुष्पकमल दाहालले समेत घटनाको सम्पूर्ण जिम्मेवारी पूर्वराजाले लिनुपर्ने बताए। शनिबार पार्टी कार्यालय निरीक्षणका क्रममा उनले घटनामा संलग्न सबैलाई कारबाहीको दायरामा ल्याउन माग गरे। संविधान र गणतन्त्रको रक्षा गर्न १२ बुँदे शान्ति सम्झौताका सहयात्रीहरू एक ठाउँमा आउनुपर्ने उनको भनाइ थियो।
जनता समाजवादी पार्टी नेपाल, एकीकृत समाजवादी, रास्वपा लगायतका दलहरूले पनि हिंसात्मक घटनाको निन्दा गर्दै दोषीमाथि कठोर कारबाहीको माग गरेका छन्। रास्वपाले घटनाको सत्यतथ्य पत्ता लगाउन न्यायिक आयोग गठन गर्नुपर्ने माग गर्दै सरकारको तयारी कमजोर रहेको टिप्पणी गरेको छ।
संविधान र गणतन्त्रको रक्षा गर्न दलहरू एकजुट हुनुपर्ने निष्कर्षसहित प्रमुख दलहरूले हिंसात्मक घटनाको छानबिन गरी दोषीलाई कारबाही गर्न सरकारलाई आग्रह गरेका छन्।
सम्बन्धित शीर्षकहरु
