म्यानमारमा शुक्रबार बिहान करिब १२ बजे ७.७ रेक्टरस्केलको शक्तिशाली भूकम्प गएको छ, जसका कारण ठूलो क्षति भएको छ। भूकम्पपछि लगातार पराकम्पहरू गइरहेका छन्, जसले मृतक संख्यामा उल्लेखनीय वृद्धि हुन सक्ने अनुमान गरिएको छ।
युनाइटेड स्टेट जियोलोजिकल सर्वे (युएसजिएस)का अनुसार मृतक संख्या १० हजारभन्दा बढी पुग्न सक्ने सम्भावना छ। यद्यपि, म्यानमारको सैन्य सरकारले हालसम्म १४४ जनाको मृत्यु पुष्टि गरेको छ भने ७३२ जना घाइते भएको जनाएको छ।
यो भूकम्पको धक्का म्यानमारसहित थाइल्यान्ड, भारत, बंगलादेश र चीनसम्म महसुस गरिएको थियो। थाइल्यान्डको राजधानी बैंककमा ३० भन्दा बढी निर्माणाधीन भवन भत्किएका छन्। ती भवनमा कार्यरत ४०० भन्दा बढी कामदारमध्ये ११० जना बेपत्ता रहेको जनाइएको छ। थाइल्यान्डमा हालसम्म १० जनाको मृत्यु भएको छ भने सरकारले राष्ट्रिय संकटको घोषणा गरेको छ।
भूकम्प गएको १२ मिनेटपछि ६.४ रेक्टरस्केलको अर्को शक्तिशाली पराकम्प गएको थियो। त्यसपछि पनि निरन्तर साना पराकम्पहरू गइरहेका छन्, जसले थप क्षति पुर्याउने सम्भावना बढाएको छ।
यस घटनापछि म्यानमारको सैन्य सरकारले अन्तर्राष्ट्रिय समुदायसँग राहत र उद्धारका लागि सहयोग गर्न आग्रह गरेको छ। यसअघि, सन् २०२१ मा पनि म्यानमारमा ६.२ र ६.४ रेक्टरस्केलका भूकम्प गएका थिए।
सम्बन्धित शीर्षकहरु
