काठमाडौँ । नेपाल स्टक एक्सचेन्ज (नेप्से) को प्रमुख कार्यकारी अधिकृत (सिइओ) पदका लागि संक्षिप्त सूचीमा परेका पाँच उम्मेदवारलाई चैत ६ गते अन्तर्वार्ता तथा प्रस्तुतीकरणका लागि बोलाइएको छ।

सिइओ नियुक्तिका लागि खुलेको प्रतिस्पर्धामा आवेदन दिएका १० जनामध्ये पाँच जना अन्तिम सूचीमा छनोट भएका हुन्। छनोट सूचीमा झापाका चुडामणी चापागाई, सर्लाहीका नारद कुमार लुइँटेल, इलामका पूर्णबहादुर आचार्य, नुवाकोटका बद्रिप्रसाद प्याकुरेल र पाल्पाका हेमन्त बस्याल परेका छन्।

यसअघि, झापाका युवराज दाहाल, काभ्रेपलाञ्चोकका प्रविण अधिकारी, सिराहाका बिमल कुमार तिवारी, पाल्पाका कृष्णबहादुर कार्की र डडेलधुराका मुकुन्दराज जोशीले पनि आवेदन दिएका थिए। तर, उनीहरू छनोट सूचीमा परेनन्।

सरकारले नेप्सेको सिइओ छनोट खुला प्रतिस्पर्धाबाट गर्ने निर्णय गर्दै तीन सदस्यीय समिति गठन गरेको थियो। उक्त समितिले योग्य उम्मेदवारहरूको मूल्याङ्कन गर्दै पाँच जनाको सूची सार्वजनिक गरेको हो। अब छनोटमा परेका उम्मेदवारहरूको अन्तर्वार्तापछि नेप्सेको नयाँ सिइओ नियुक्त गरिनेछ।