नेपाल धितोपत्र बोर्डले धितोपत्र बजार सहभागीहरूका लागि लक्षित वित्तीय कारबाही (Targeted Financial Sanctions) सम्बन्धी मार्गदर्शन जारी गरेको छ। मनी लाउन्डरिङ निवारण नियमावली २०८१ अन्तर्गत, नियम ६९ को उपनियम (३) अनुसार, बोर्डले “Guidelines on Targeted Financial Sanctions for Securities Markets Participants” शीर्षकमा उक्त मार्गदर्शन सार्वजनिक गरेको हो।

मार्गदर्शनका मुख्य व्यवस्थाहरू निम्नानुसार रहेका छन्:

१. संयुक्त राष्ट्र संघको प्रतिबन्धित सूचीको अद्यावधिक:
नेपाल सरकार, गृह मन्त्रालयको वेबसाइटमा प्रकाशित संयुक्त राष्ट्र संघको प्रतिबन्धित सूचीमा सूचीकृत व्यक्ति, समूह वा संगठनको धितोपत्र कारोबारको तथ्याङ्क (डेटाबेस) नियमित रूपमा यकिन गर्नुपर्नेछ। यसका लागि अद्यावधिक प्रणाली स्थापना गर्नुपर्नेछ।

२. सम्पत्ति वा कोष रोक्का:
सूचीकृत व्यक्ति, समूह वा संगठनसँग सम्बद्ध अन्य कुनै व्यक्ति वा समूहको सम्पत्ति वा कोष आफ्नो नियन्त्रणमा भएमा तत्काल रोक्का राख्नुपर्नेछ।

३. आतङ्कवाद तथा विनाशकारी हातहतियारमा वित्तीय लगानी रोकथाम:
धितोपत्र बजार सहभागीहरूले आतङ्ककारी कार्य वा विनाशकारी हातहतियार निर्माण तथा विस्तारमा वित्तीय लगानी निवारणसँग सम्बन्धित व्यवस्थाहरू पालना गर्नुपर्नेछ।

४. शङ्कास्पद व्यक्ति रिपोर्टिङ:
आतङ्कवाद वा विनाशकारी हातहतियार निर्माणमा संलग्न शङ्कास्पद व्यक्तिको वित्तीय गतिविधिको सूचना वित्तीय जानकारी इकाईमा रिपोर्टिङ गर्नुपर्नेछ।