काठमाडौं — विद्यालय शिक्षा ऐन तत्काल जारी गर्न माग गर्दै आन्दोलनरत नेपाल शिक्षक महासंघले सरकारसँग वार्तामा बस्न अस्वीकार गर्दै चौथो दिन पनि आन्दोलनलाई निरन्तरता दिएको छ। बुधबारदेखि देशभरका शिक्षकहरू काठमाडौंमा भेला भई माइतीघरदेखि नयाँ बानेश्वरसम्म प्रदर्शन गरिरहेका छन्।
शिक्षकहरूको आन्दोलनका कारण विद्यालयहरूमा पठनपाठन मात्र नभई एसईईको उत्तरपुस्तिका परीक्षण कार्य पनि प्रभावित भएको छ। चैत १८ गते सम्पन्न भएको एसईई परीक्षाको उत्तरपुस्तिका संकलन भइसकेको अवस्थामा परीक्षणमा ढिलाइ हुने शिक्षा मन्त्रालयले जनाएको छ।
शिक्षा मन्त्रालयले वार्ताका लागि पटक–पटक आग्रह गरे पनि महासंघले भने सरकारले विगतमा गरेका सहमति कार्यान्वयन नगरेसम्म वार्ता आवश्यक नरहेको जनाएको छ। मन्त्रालयका प्रवक्ता शिवकुमार सापकोटाले शिक्षकहरू वार्तामा नआउँदा शैक्षिक गतिविधि प्रभावित भएको बताए। उनका अनुसार अहिले नयाँ शैक्षिक सत्र सुरु गर्ने तयारी, नतिजा प्रकाशन, योजना निर्माण, भर्ना तथा अभिभावक परामर्शका काममा समेत असर परेको छ।
शिक्षक महासंघका अध्यक्ष लक्ष्मीकिशोर सुवेदीले भने सरकारसँग २०७५, २०७८ र २०८० मा भएका सहमति कार्यान्वयन नगरी वार्तामा बस्नुपर्ने कुनै औचित्य नरहेको जिकिर गर्दै तत्काल अध्यादेशमार्फत, संसद्को बर्खे अधिवेशन वा विशेष अधिवेशन डाकेर विद्यालय शिक्षा ऐन जारी गर्नुपर्ने माग दोहोर्याए।
प्रधानमन्त्री केपी शर्मा ओलीले भने सरकार शिक्षकको आवाज सुन्न तयार रहेको स्पष्ट पार्दै आन्दोलन नगरी सानो प्रतिनिधिमण्डलमार्फत कुराकानी गरे हुने प्रतिक्रिया दिएका छन्। थाइल्यान्ड भ्रमण सकाएर फर्किएपछि शनिबार पत्रकारहरूसँग कुरा गर्दै उनले सरकारले शिक्षकका माग सम्बोधन गर्ने प्रतिबद्धता जनाएको बताए।
शिक्षकहरूले पेशागत अधिकारसँगै संघीयताको भावनाविपरीत स्थानीय तहको मातहत बस्न नमान्ने अडान लिएका छन्। उनीहरूको मुख्य माग जिल्ला शिक्षा कार्यालय यथावत राखी शिक्षकहरूको व्यवस्थापन गर्ने, सरुवा, बढुवा र नियुक्ति व्यवस्था पुरानै प्रणालीबाट गर्नुपर्ने रहेको छ।
हाल विद्यालय शिक्षा विधेयक प्रतिनिधिसभाको शिक्षा, स्वास्थ्य तथा सूचना प्रविधि समितिमा विचाराधीन अवस्थामा रहेको छ। समितिले छिटो निर्णय लिन ११ सदस्यीय उपसमिति गठन गरिसकेको छ।
यसअघि पनि शिक्षक महासंघले विधेयक संसद्मा दर्ता भएपछि आन्दोलन गरेको थियो। सरकारसँग सहमति भएपछि उनीहरू विद्यालय फर्किएका थिए। तर ऐन पारितमा ढिलाइ भएपछि पुनः आन्दोलनमा उत्रिएका हुन्।
सम्बन्धित शीर्षकहरु
