परासी — बुटवल–नारायणगढ सडकखण्डअन्तर्गत दाउन्ने क्षेत्रमा रातिको समयमा सवारी आवागमन रोक्दै सडक विस्तारको काम अघि बढाइने भएको छ। हाल सो क्षेत्रमा पहाड कटान, पर्खाल निर्माण तथा कल्भर्ट निर्माण कार्य तीव्र गतिमा भइरहेको छ, जसका कारण दैनिकजसो सवारी जामको समस्या देखिएको छ भने यात्रुहरूलाई घण्टौँसम्म सास्ती खेप्न बाध्य छन्।

पूर्वी नवलपरासीका प्रमुख जिल्ला अधिकारी भविश्वर पाण्डेका अनुसार, निर्माणको कामलाई प्रभावकारी रूपमा अघि बढाउन आगामी चैत २७ गतेदेखि ३१ गतेसम्म दिउँसो ११ बजेदेखि ३ बजेसम्म र वैशाख १ गतेदेखि १५ गतेसम्म राति ११ बजेदेखि बिहान ५ बजेसम्म अत्यावश्यक सवारीबाहेकका सम्पूर्ण सवारीसाधन सञ्चालनमा रोक लगाइनेछ। उक्त समयमा सडक मर्मत तथा विस्तारको काम तीव्र रुपमा गरिने जनाइएको छ।

पश्चिम तथा पूर्वी नवलपरासीका जिल्ला समन्वय समिति, जिल्ला प्रशासन, सुरक्षा निकाय तथा सरोकारवाला निकायका प्रतिनिधिहरूको शनिबारको स्थलगत निरीक्षणपछि यस्तो निर्णय गरिएको हो। हाल दाउन्ने खण्डको १४ किलोमिटर दुरी पार गर्न सवारी जामका कारण ५ देखि ६ घण्टा समय लाग्ने अवस्था छ, जसले गर्दा यात्रुहरूलाई ठूलो कठिनाइ भइरहेको छ।