काठमाडौं – राजश्व छली गर्दै अवैध रूपमा विदेशी मुद्रा ओसारपसार तथा कारोबार गर्ने गिरोहलाई प्रहरीले पक्राउ गरेको छ। मंगलबार राति ११ बजे काठमाडौंको टोखा नगरपालिका-२, झोरमा एक मालवाहक ट्रकबाट करिब २५ करोड रुपैयाँ बराबरको विदेशी मुद्रा बरामद गरिएको हो।

प्रहरीका अनुसार, बरामद रकममा अमेरिकी डलर र युरो रहेका छन्। काठमाडौं उपत्यका अपराध अनुसन्धान कार्यालयका प्रमुख, प्रहरी वरिष्ठ उपरीक्षक (एसएसपी) रमेशकुमार बस्नेतका अनुसार, विशेष सुराकीका आधारमा रसुवातर्फ जाँदै गरेको ट्रकलाई नियन्त्रणमा लिइएको थियो। ट्रक चालक सिन्धुपाल्चोक भोटेकोशी गाउँपालिका-१ का फुच्चे भन्ने कुसाङ लामा रहेका छन्। ट्रकको ड्राइभर बस्ने कोठाको माथिल्लो भागमा फल्सबटम बनाई लुकाइएको मुद्रा बरामद गरिएको प्रहरीले जनाएको छ।

बरामद विदेशी मुद्रामा अमेरिकी डलर १ सय दरका ३ हजार ११९ थान, ५० दरका १७९ थान, युरो ५ सय दरका ११ थान, २ सय दरका ४८० थान, १ सय दरका ४ हजार १४८ थान, ५० दरका १७ हजार १७७ थान तथा दुई थान मोबाइल फेला परेको छ।

४३ वर्षीय कुसाङ लामा यसअघि पनि अवैध सुन तस्करीको आरोपमा पक्राउ परी ५ वर्ष जेल बसेका थिए। जेलबाट निस्किएपछि उनले आमाको नाममा ट्रक दर्ता गराएका थिए। उक्त अवैध रकम कसको हो भन्ने विषयमा प्रहरीले थप अनुसन्धान गरिरहेको छ। एसएसपी बस्नेतका अनुसार, पक्राउ परेका लामाले केही व्यक्तिको नाम उल्लेख गरेका छन्, जसको विस्तृत अनुसन्धान भइरहेको छ।