देशभरका शिक्षकले आफ्ना विभिन्न माग पूरा गर्न दबाब दिन बुधबार काठमाडौंको माइतीघर क्षेत्रमा प्रदर्शन गरेका छन्। ७५३ पालिकाका सार्वजनिक र निजी विद्यालयका करिब एक लाख शिक्षकको सहभागितामा भएको प्रदर्शनमा विद्यालय शिक्षा ऐन तत्काल जारी गर्न माग गरिएको छ। नेपाल शिक्षक महासंघको अगुवाइमा भएको आन्दोलनमा शिक्षालाई गुणस्तरीय बनाउन र शिक्षक तथा विद्यालय कर्मचारीको व्यवस्थापन गर्न नयाँ ऐन आवश्यक रहेको शिक्षकहरूले बताएका छन्।
शिक्षकहरूले राजतन्त्रकालमा ल्याइएको शिक्षा ऐन गणतन्त्रमा सान्दर्भिक नभएको भन्दै वर्तमान परिस्थितिअनुसार संशोधित ऐन ल्याउनुपर्ने माग राखेका छन्। पाल्पाबाट आएका शिक्षक झविन्द्र देवकोटाले शिक्षामा सुधार ल्याउन कानुनी परिमार्जन आवश्यक रहेको बताए। उनले राजतन्त्रकालीन ऐनकै आधारमा शिक्षक नियुक्ति र पठनपाठन भइरहेको उल्लेख गर्दै वर्तमान समयमा त्यसले चुनौती थपेको बताए।
काठमाडौंका विभिन्न स्थानबाट निस्किएका शिक्षकहरूको र्याली माइतीघरमा पुगेर धर्नामा परिणत भएको थियो। संसद्को हिउँदे अधिवेशनबाट विद्यालय शिक्षासम्बन्धी विधेयक पारित गर्न दबाब दिन शिक्षकहरूले माघ १८ गतेदेखि आन्दोलन सुरु गरेका थिए। तर अधिवेशन अन्त्य भएसँगै सरकारले ऐन पारित नगरेपछि आन्दोलन चर्किएको हो। महासंघका अध्यक्ष लक्ष्मीकिशोर सुवेदीले सरकारले शिक्षकसँग भएका सहमति कार्यान्वयन नगरेको आरोप लगाउँदै नयाँ ऐन जारी नभएसम्म आन्दोलन जारी रहने बताए।
सरकारले २०८० असोज ५ गते महासंघसँग शिक्षकको आवधिक बढुवा, सेवा सुविधामा सुधार, विद्यालय कर्मचारीको स्थायित्वलगायत विषयमा सहमति गरेको थियो। शिक्षकहरूले आफूहरूलाई स्थानीय तहको नियन्त्रणमा नराखी संघीय सरकार मातहत राख्नुपर्ने माग अघि सारेका छन्। संविधानअनुसार विद्यालय शिक्षा स्थानीय तहको जिम्मेवारीमा रहेकाले यो माग पूरा गर्न संविधान संशोधन आवश्यक पर्ने देखिन्छ।
शिक्षकहरूले परीक्षा तथा नतिजा प्रकाशनको काम सकाएर मात्रै आन्दोलनमा सहभागी भएको बताए। प्रदर्शनमा सहभागी शिक्षकहरूले सडकमा फोहोर नगरी प्रयोग भएका सामग्री आफैं बोक्ने जिम्मेवारी निर्वाह गरेको दृश्य देखियो। महासंघले सरकारले ऐन तत्काल ल्याएमा आन्दोलन रोक्ने तर अन्यथा निरन्तर दबाब दिइरहने चेतावनी दिएको छ।
सम्बन्धित शीर्षकहरु
