काठमाडौं । टोखाबाट बरामद करिब २५ करोड रुपैयाँ बराबरका विदेशी मुद्रा तस्करी प्रकरणमा राजनीतिक संलग्नता देखिएको छ। युरो र अमेरिकी डलर तस्करीको अनुसन्धानमा सिन्धुपाल्चोकका माओवादी कार्यकर्ता नारायण पौडेलको संलग्नता पुष्टि भएको छ। उनका भाइ तथा २०७४ मा माओवादीबाट भोटेकोशी गाउँपालिका अध्यक्ष भएका राजकुमार पौडेलसमेत १५ किलो सुन तस्करी प्रकरणमा संलग्न थिए।

पौडेल परिवारका चारै दाजुभाइ विभिन्न तस्करी गतिविधिमा संलग्न रहेको देखिएको छ। कोही सुन तस्करी, कोही हुन्डी कारोबार, कोही विदेशी मुद्रा तस्करी त कोही रक्तचन्दन तस्करीमा जोडिएका छन्। राजकुमार २०७४ मा गाउँपालिका अध्यक्ष निर्वाचित भएपछि १५ किलो सुन तस्करीमा मुछिएर फरार भएका थिए। पछि धरौटीमा रिहा भएका उनी २०७९ को स्थानीय चुनावमा पराजित भएका थिए।

यसैबीच, काठमाडौँ उपत्यका अपराध अनुसन्धान कार्यालयले चैत ४ गते रसुवागढी नाका हुँदै चीन तस्करी गर्न लागिएको १३ लाख ६९ हजार १ सय ५० युरो र ३ लाख २० हजार ८ सय ५० अमेरिकी डलरसहित कुसाङ लामालाई पक्राउ गरेको थियो। प्रहरीले ट्रकसहित पक्राउ गरेका लामाको अनुसन्धानपछि पौडेलको संलग्नता देखिएको हो। लामाले अनुसन्धानमा सहयोग नगरेपछि उनको मोबाइल फरेन्सिक जाँच गर्दा तस्करीमा पौडेलको मुख्य भूमिका रहेको प्रमाण फेला परेको थियो।

पौडेलको ठेगाना सिन्धुपाल्चोकको भोटेकोशी गाउँपालिका भए पनि हाल टोखामा बस्दै आएका थिए। उनले चीन पठाउने योजनासहित उक्त विदेशी मुद्रा व्यवस्थापन गरेको अनुसन्धानमा खुलेको छ। प्रहरीका अनुसार पौडेल घटनापछि फरार भएका छन् भने अदालतले उनको नाममा पक्राउ पुर्जी जारी गरिसकेको छ।

यसअघि, लामासमेत सुन तस्करी प्रकरणमा पक्राउ परी ५ वर्ष जेल बसेका थिए। २०७३ मा टोयोटा गाडीको एयर फिल्टरमा लुकाइएको ७ किलो सुनसहित पक्राउ परेका लामाले धरौटी बुझाउन नसकेपछि थप चार वर्ष जेल सजाय भोगेका थिए। अहिले पुनः उनी विदेशी मुद्रा तस्करी प्रकरणमा पक्राउ परेका छन्।

अनुसन्धान अधिकारीहरूका अनुसार नारायण पौडेल लामो समयदेखि तस्करी नेटवर्कमा सक्रिय थिए। उनी व्यापारको आडमा सुन, विदेशी मुद्रा तथा अन्य अवैध कारोबार गर्दै आएका थिए। प्रहरी स्रोतका अनुसार पौडेलसहितको गिरोह सत्ताको आडमा तस्करी गर्दै आएको थियो, जसले गर्दा उनीहरूमाथि अनुसन्धान प्रक्रिया अवरुद्ध हुँदै आएको देखिन्छ।

अहिले पौडेल फरार रहेकाले प्रहरीले उनको खोजी कार्यलाई तीव्र बनाएको छ। राजस्व अनुसन्धान विभागका महानिर्देशक चण्डीप्रसाद घिमिरेका अनुसार पौडेलको घरलगायत स्थानमा तलासी लिइएको छ। तर, उनी घटनापछि घर छोडेर भागिसकेको बताइएको छ। अनुसन्धानका क्रममा यो गिरोहको राजनीतिक पहुँचका कारण अघिल्लो पटक जस्तै मुद्दा कमजोर बनाउने प्रयास हुनसक्ने भन्दै अधिकारीहरू सतर्क छन्।