काठमाडौं । काठमाडौं महानगरपालिकाले पूर्वराजा ज्ञानेन्द्र शाहलाई तीनकुने क्षेत्रमा सार्वजनिक सम्पत्तिमा क्षति पुर्‍याएको भन्दै आठवटा पत्र पठाउँदै ७ लाख ९३ हजार रुपैयाँ जरिवाना तिर्न निर्देशन दिएको छ।

शुक्रबारको प्रदर्शनका क्रममा तीनकुने, कोटेश्वरलगायतका क्षेत्रमा सार्वजनिक संरचना जलाएको, भत्काएको तथा महानगरको दमकलमा ढुंगामुढा गरेको क्षतिलाई मूल्याङ्कन गर्दै फरक–फरक पत्रमार्फत जरिवाना रकम तोकिएको महानगर स्रोतले जनाएको छ।

महानगरले कोटेश्वर तथा तीनकुने क्षेत्रको सडक तथा पेटीमा जथाभावी फोहोरमैला फ्याँकी वातावरण प्रदूषण गरेको भन्दै शाहलाई १/१ लाख रुपैयाँ जरिवाना गरेको छ। त्यस्तै, दमकल तथा अग्निनियन्त्रकमाथि ढुंगामुढा गरी क्षति पुर्‍याएको आरोपमा १ लाख ३० हजार रुपैयाँ जरिवाना तोकिएको छ।

तीनकुने क्षेत्रमा वातावरण प्रदूषण गरेको भन्दै थप १ लाख रुपैयाँ जरिवाना गरिएको छ भने बालकुमारी र जडीबुटी सडक क्षेत्रमा फोहोरमैला फ्याँकेका कारण १/१ लाख रुपैयाँ जरिवाना गरिएको छ।

तीनकुने क्षेत्रमा रहेका रुख–बिरुवा तथा रेलिङ भत्काएको क्षतिबाफत ४० हजार रुपैयाँ र आइल्याण्ड तोडफोड गरेको भन्दै २३ हजार रुपैयाँ जरिवाना तोकिएको छ।

महानगरले यी सबै ८ वटै पत्र आइतबार कार्यालय समयमा निर्मल निवास पठाउने जनाएको छ।

जरिवानाको विवरण