काठमाडौं। गणतन्त्र पक्षधर र राजावादी समूहले आज काठमाडौंमा छुट्टाछुट्टै प्रदर्शन गर्ने भएका छन्। दुवै पक्षको प्रदर्शन एकैदिन परेपछि सरकारले सुरक्षालाई कडा बनाएको छ। प्रशासनले निश्चित क्षेत्र तोकी प्रदर्शनका लागि अनुमति दिएको छ भने सोही अनुसारको सुरक्षा रणनीति अवलम्बन गरिएको छ।
काठमाडौं जिल्ला प्रशासन कार्यालयले गणतन्त्र पक्षधर समूहलाई प्रदर्शनीमार्ग–भृकुटीमण्डप क्षेत्रमा र राजतन्त्र समर्थक समूहलाई तीनकुने क्षेत्रमा प्रदर्शनको अनुमति दिएको छ।
गणतन्त्र पक्षधर प्रदर्शन समाजवादी मोर्चाका दलहरू नेकपा (माओवादी केन्द्र), नेकपा (एकीकृत समाजवादी), नेपाल समाजवादी पार्टी र नेकपा विप्लव समूहले आयोजना गरेका हुन्। उनीहरूले माइतीघर मण्डला, कुपण्डोल, त्रिपुरेश्वर, सुन्धारा, न्युरोड, सोह्रखुट्टे, शान्तिबाटिका र मैतिदेवी गरी आठ वटा मार्गबाट ¥याली निकालेर भृकुटीमण्डपमा कोणसभा गर्नेछन्।
त्यसैगरी, राजतन्त्र पुनःस्थापनाको मागसहित राष्ट्रिय प्रजातन्त्र पार्टी (राप्रपा) र विवादित व्यवसायी दुर्गा प्रसाईं नेतृत्वको ‘राष्ट्र, राष्ट्रियता, धर्म, संस्कृति र नागरिक बचाउ महाअभियान’ समूहले प्रदर्शनको तयारी गरेको छ। उनीहरूले राजतन्त्रसहित हिन्दूराज्यको पुनःस्थापनाको माग अघि सारेका छन्।
प्रदर्शनलाई लिएर काठमाडौं उपत्यकामा सुरक्षा सतर्कता बढाइएको छ। सम्भावित झडप वा अप्रिय घटना रोक्न विभिन्न ठाउँमा सुरक्षाकर्मी परिचालन गरिएको छ।
सम्बन्धित शीर्षकहरु
