पोखरा – सिचुवान एयरलाइन्सले छेन्दु–पोखरा व्यावसायिक चार्टर उडान नियमित रूपमा सञ्चालन गर्न थालेको छ। नेपाल–चीन मैत्री सम्बन्ध स्थापनाको ७० औं वर्षको अवसर पारेर एयरलाइन्सले यो उडान सुरु गरेको हो।

सिचुवान एयरलाइन्सको चार्टर उडानमार्फत १२७ जना चिनियाँ नागरिक पोखरा आएका छन्, भने सोही जहाजबाट पोखराका मेयर धनराज आचार्यसहित १२६ जना मंगलबार चीन प्रस्थान गरेका छन्। नेपाली टोलीले चीनको छेन्दु लगायत विभिन्न सहरहरूमा आयोजना हुने सेल्स मिसनमा सहभागिता जनाउनेछ।

चिनियाँ भ्रमण टोलीमा व्यवसायी, कलाकार लगायत विभिन्न क्षेत्रका व्यक्तिहरू रहेका छन्। उनीहरू आगामी आइतबार पोखरामा आयोजना हुने चिनियाँ सांस्कृतिक कार्यक्रममा सहभागी हुनेछन्। यो कार्यक्रम चिनियाँ राजदूतावास र पोखरा महानगरपालिकाको सहकार्यमा आयोजना गरिएको हो।

सिचुवान एयरलाइन्सले सातामा एक पटक पोखरा अन्तर्राष्ट्रिय विमानस्थलमा चार्टर उडान गर्नेछ। हालसम्म पोखराबाट तीनवटा उडान तथा चीनतर्फ १० वटा उडान बुक भइसकेको पोखरा महानगरपालिकाका मेयर आचार्यले जानकारी दिएका छन्।