काठमाडौं । पोखराबाट काठमाडौं उडेको यती एयरलाइन्सको एक जहाजको इन्जिनमा खराबी आएपछि आकाशबाटै पोखरा फर्काइएको छ । यती एयरलाइन्सको ६७२ उडान नम्बरको एटीआर ७२ जहाज आज बिहान पोखराबाट काठमाडौं उडेको ६ मिनेटमै पुनः पोखरामै फर्काइएको हो ।

यती एयरलाइन्सका प्रवक्ता सुदर्शन बर्तौलाका अनुसार जहाजको इन्डिकेटरले बायाँ इन्जिनमा ‘रेड लाइट’ देखाएपछि थप जोखिम नलिने निर्णय गर्दै पाइलटले जहाज पोखरा अवतरण गराएको जानकारी दिए । ‘हवाई सुरक्षामा थप जोखिम नहोस् भनी जहाज पोखरा फर्काइएको छ,’ उनले भने । बिहान ८ बजे उडेको जहाजमा ४५ जना यात्रु थिए ।

इन्जिनियरहरुले जहाजको जाँच थालेको समेत उनले बताए । गत जेठ १६ गते यती एयरको भागीनी संस्था तारा एयरको जहाज मुस्ताङमा दुर्घटना भएको थियो । दुर्घटनाम परी जहाजमा रहेका चालक दलका ३ सदस्य र १९ जना यात्रु सबैको ज्यान गएको थियो ।