काठमाडौं । संखुवासभाको मादी नगरपालिका-१ मा कै परिवारको ६ जनाको सामूहिक हत्या आरोपमा थप कोही पक्राउ नपरेको प्रहरीले बताएको छ ।

जिल्ला प्रहरी कार्यालय संखुवासभाले प्रेस विज्ञप्तिमार्फत घटनामा थप व्यक्ति पक्राउ नपरेकाे जनाएकाे हाे । यसअघि घटनामा नयाँ ट्वीस्ट भन्दै थप एकजना पक्राउ परेको र लोकबहादुरको घरमा मृतकमध्ये एकजनाको मोबाइल भेटिएको भन्दै समाचार आएपछि जिल्ला प्रहरी कार्यालयले विज्ञप्ति निकालेको छ ।

संखुवासभा प्रहरी प्रवक्ता इन्स्पेक्टर शुभेश अधिकारीले समाचारप्रति गम्भीर ध्यानाकर्षण भएको बताएका हुन् । जिल्ला प्रहरी कार्यालयको विज्ञप्तिमा भनिएको छ, ‘यस घटना सम्बन्धमा प्रहरीले थप कोही कसैलाई नियन्त्रणमा नलिएको कुरा सबैमा जानकारी गराइन्छ।’

९० वर्षीय बुद्धमान कार्कीको परिवारका उनीबाहेक ६ सदस्यको भदौ २१ गते हत्या भएको थियो । प्रहरीले हत्यामा संलग्न भतिजा नातेदारका लोकबहादुर कार्कीलाई पक्राउ गरिसकेकाे छ ।

– यसअघि प्रकाशित समाचारमा लाेकबहादुर कार्कीका भाइ पक्राउ भएकाे उल्लेख भएकाेमा सच्याइएकाे छ । –सम्पादक