काठमाडाैं । सरकारले पुन: स्मार्ट लकडाउनको तयारी गरेको छ । कोभिड–१९ संकट व्यवस्थापन केन्द्र (सीसीएमसी) ले शुक्रबारको निर्देशक समितिको बैठकमा स्मार्ट लकडाउन प्रस्ताव गरेको हो । प्रधानमन्त्री शेरबहादुर देउवाको अध्यक्षता निर्देशक समिति बैठक बसेको थियो ।

‘जहाँ संक्रमण बढी छ, सम्बन्धित जिल्ला वा स्थानीय तहले नै लकडाउन गर्न सक्ने अवधारणाको प्रस्ताव सीसीएमसीले गरेको छ’, सीसीएमसीका प्रवक्ता नुरहरि खतिवडाले भने । वैज्ञानिक र व्यावहारिक हुने गरी लकडाउन गर्ने अवधारणा नै स्मार्ट लकडाउन रहेको उनले स्पष्ट पारे।

अहिलेसम्म भइरहेका लकडाउन जिल्ला प्रशासन कार्यालयमार्फत भए पनि केन्द्रको नियन्त्रण रही आएको छ । अब हुने लकडाउनमा जिल्लाले स्वयं अवस्था हेरेर निर्णय गर्न सक्छ । स्मार्ट लकडाउनको अवधारणाअनुसार जहाँ कोरोना संक्रमण बढ्छ, त्यहाँ लकडाउन हुन्छ, जहाँ घट्छ, खुला हुँदै जान्छ । यो समाचार आजको अन्नपूर्ण पोस्ट् दैनिकमा छ ।

सरकारले काेराेना संक्रमणकाे दाेस्राे लहर आएपछि उपत्यकामा गएकाे वैशाख १६ देखि निषेधाज्ञा जारी गरिरहेकाे छ । पछिल्लाे समय पनि निषेधआदेश पूर्णरुपमा हटेकाे भने छैन । पुन: काेराेना संक्रमणकाे दर भने दैनिक बढीरहेकाे छ ।