क्यारेवियन प्रिमियर लिग अन्तर्गत आइतबार भएको खेलमा सन्दीप लामिछाने आबद्ध जमैका तल्लावाजले जित निकालेको छ । सेन्ट किट्स एण्ड नेभिस पेट्रियोट्सलाई ३७ रनले पराजित गरेकाे हाे ।

टस जितेर ब्याटिङमा उत्रिएको जमैकाले निर्धारित २० ओभरमा ६ विकेट गुमाउएर १ सय ४७ रन बनाएको थियो । उसका लागि ग्लेन फिलिप्सले सर्वाधिक ७९ रन बनाए । यसैगरी जर्मेइन ब्लाकउडले २७ रन, न्क्रुम बोनरले १६ रन तथा आशिफ अलीले १६ रनको योगदान दिएका थिए ।

१ सय ४७ रनको लक्ष्य पछ्याएर जवाफी ब्याटिङमा उत्रिएको पेट्रियोट्स १९.४ ओभरमा १ सय १० रनमा अलआउट भयाे । जमैकाका लागि कार्लोस ब्रेथवेटले सर्वाधिक ३ विकेट लिए । सन्दीप लामिछाने, वीरासम्मी परमउल र फिडेल एडवार्डले समान २/२ विकेट लिए । त्यस्तै मुजिव उल रहमानले १ विकेट लिए ।

लामिछानेले इभिन लेविस र इस सोधीको विकेट लिएका थिए । जमैकाले अर्को खेल ट्रिनबागो नाइट राइडर्ससँग सेप्टेम्बर १ मा खेल्नेछ ।