रियल मड्रिड स्पेनिस ला लिगा फुटबलको उपाधि यात्रामा थप नजिक पुगेकाे छ । शुक्रबार राति भएकाे खेलमा रियल मड्रिडले एलाभेसमाथि २–० को जित निकालेकाे हाे ।

रियल मड्रिडकाे घरेलु मैदानमा भएको खेलमा मड्रिडका लागि करिम बेन्जिमा र मार्काे एसेन्सिओले गोल गरे । खेलको दोस्रो मिनेटमा नै अलाभेसका जोसेलुको हेडर प्रहार क्रसबारमा लागेर फर्किएपछि पाहुना टिम अभागी बन्यो ।

त्यसपछि ११ औं मिनेटमा रियलले पेनाल्टी पायाे । भीएआरकाे सहायताबाट पाएको पेनाल्टीमा बेन्जिमाले गोल गरी सुरुवाती अग्रता दिलाए ।

खेलकाे ५० औँ मिनेटमा बेन्जेमाकाे पासमा एसेन्सिओले गोल गरेपछि रियल मड्रिड २–० ले विजयी भयाे । जितपछि शीर्ष स्थानको रियल मड्रिडको ३५ खेलबाट ८० अंक भएको छ । दोस्रो स्थानमा रहेको बार्सिलाेनाकाे ७६ अंक छ । अब रियालका लागि बाँकी तीन खेलमा एक जित र २ बराबरी भए पनि उपाधिका लागि पर्याप्त हुनेछ ।