इंग्लिस प्रिमियर लिग अन्तर्गत मंगलबार राति सम्पन्न खेलमा क्रिस्टल प्यालेस चेल्सीसँग पराजित भएकाे छ । प्यालेसकाे घरेलु मैदानमा भएकाे खेलमा चेल्सीले ३–२ गोलअन्तरको जित निकालेको हो । चेल्सीकाे जितका लागि ओलिभर गिराउड, क्रिस्टियन पुलिसिक र टमी अब्राहमले गोल गरे ।
खेलको छैटौं मिनेटमा गिराउडले गोल गरी चेल्सीलाई सुरुवती अग्रता दिलाएका थिए । त्यस्तै, २७ औं मिनेटमा पुलिसिकले गोल गरेपछि चेल्सी २ गोलले अघि लागेकाे हाे ।
३४ औं मिनेटमा क्रिस्टलका विल्फ्रेड जहाले गोल गरेपछि भने खेल २–१ स्थितिमा पुगेकाे थियाे ।
खेलको ७१ औं मिनेटमा अब्राहमले गोल गरेपछि फेरि २ गोलको अग्रता बनाएको चेल्सीविरुद्ध क्रिस्टियन बेन्टेकले ७२ औं मिनेटमै गोल गरे । खेलकाे २ मिनेटकाे अन्तरमा २ पक्षले नै एक-एक गाेल गरेका थिए । त्यसपछि बाँकी समयमा गाेल हुन सकेन र ३-२ ले चेल्सी विजयी बन्याे ।
जितसहित चेल्सी तेस्रो स्थानमा उक्लिएको छ । समान ३४ खेल खेलेको लेस्टर सिटीको ५९ अंक भएपछि अंकतालिकामा ६० अंक बनाएको चेल्सी तेस्रो स्थानमा उक्लिएको हो ।
सम्बन्धित शीर्षकहरु
