महोत्तरी । अज्ञात रोगका कारण महोत्तरीमा ज्यान जानेको संख्या १२ पुगेको छ । आइतबार थप एक जनाको ज्यान गएपछि ज्यान जानेको संख्या १२ पुगेको हो ।
आइतबार बिहान भंगाहा ७ का ५८ वर्षीय रुपनारायण सिंह दनुवारको ज्यान गएको हो । दनुवारको ज्यान गएसँगै महोत्तरीको दुई बस्तीमा अज्ञात रोगका कारण ज्यान जानेको संख्या १२ पुगेको हो । भंगाहा नगरपालिका–७ र बर्दिवास नगरपालिका–१२ एक आपसमा जोडिएका बस्ती हुन् ।
स्थानीयका अनुसार दनुवार बिहानसम्म बिरामी थिएनन् । अचानक बिरामी परेर उनको ज्यान गएको हो ।
शनिबार मात्रै बर्दिवास–१२ स्थित इँटाभट्टामा काम गर्ने ५५ वर्षीय भारतीय नागरिक मोतीलाल प्रजापति र भङ्गाहा–६ जमुनियाँका ४८ वर्षीय पलट साहको पनि अज्ञात रोगका कारण ज्यान गएको थियो ।
मृतकमा एकै खालको लक्षण देखिएको स्थानीयले बताएका छन् । स्थानीयका अनुसार अचानक पेट दुखेपछि बान्ता गर्ने र झाडापखला लाग्ने र अन्तिममा बिरामीको ज्यान जाने गरेको छ ।
सम्बन्धित शीर्षकहरु
