सर्लाही । सर्लाहीका किसानलाई जङ्गली जनावरले दुःख दिन थालेको छ ।
निलगाई, बँदेल, बाँदरलगायतका जङ्गली जनावरले बालीनाली खाएर सखाप पार्न थालेपछि जिल्लाका किसान निराश भएका छन् ।
पछिल्लो समय बढ्दो वन विनाशका कारण जङ्गली जनावर किसानको खेतबारीमा पसेर कृषि उपज नष्ट पार्न थालेको हो ।
लालबन्दी नगरपालिका–२, पुर्नवासका किसान शक्तिसिंह पासवानले हरेक बालीमा जङ्गली जनावरले क्षति गरिरहेको जानकारी दिए ।
जङ्गल क्षेत्र धेरै रहेको जिल्लाको ईश्वरपुर, लालबन्दी र हरिपुर नगरपालिका क्षेत्रमा जङ्गली जनावरको आतङ्क देखिएको छ ।
उखु खेती धेरै हुने जिल्लाको दक्षिणी भेगका किसानलाई पनि जङ्गली जनावरले दुःख दिइरहेको छ ।
कृषि ज्ञान केन्द्र मलङ्गवाका प्रमुख देवानन्द रायले जङ्गली जनावरका कारण कृषि उत्पादनमा असर गरिरहेको बताए ।
जङ्गली जनावरले बालीनाली नष्ट गरेमा सरकारले केही राहत दिने व्यवस्था भएपनि यसबारे किसान अनभिज्ञ छन् ।
जङ्गली जनावरको आतङ्क रोक्न र राहत उपलब्ध गराउन कुनै पनि निकायले सहयोग नगरेको किसानको गुनासो छ ।
सम्बन्धित शीर्षकहरु
