काठमाडौं । नेपाली काँग्रेसका नेता एवम् सांसद चन्द्र भण्डारी स्वदेश फर्कनुभएको छ । भारतको मुम्बईस्थित नेशनल बर्न अस्पतालमा उपचाररत उहाँ आईतबार साँझ स्वदेश फर्कनु भएको हो ।
त्यस क्रममा उहाँले आफूलाई बाँच्नका लागि साथ र सहयोग गरेकोमा नेपाल सरकार, विभिन्न राजनीतिक दलका नेताहरु, सहकर्मीहरु सबैप्रति आभार र धन्यवाद व्यक्त गर्नुभयो ।
त्रिभुवन अन्तराष्ट्रिय विमानस्थलको अति विशिष्ट कक्षमा पत्रकारमाझ नेता भण्डारीले आफू थप उपचारको लागि भारत गएकै दिन नेपाल सरकारले अर्को बर्न अस्पताल बनाउने निर्णय गरेकोमा खुशी लागेको बताउनुभयो ।
उहाँले त्यस अस्पताल निर्माणको नेतृत्व पनि गर्न चाहेको बताउनुभयो । उहाँले सो अस्पतालको निर्माणमा सहयोग गर्न पनि सबैलाई अपिल गर्नुभयो ।
स्वास्थ्यमा सुधार हुँदै गएपछि उहाँ स्वदेशमै बसेर उपचार गर्नेगरी स्वदेश फर्कनु भएको हो । उहाँ गत फागुन ३ गते खाना पकाउने ग्यास लिक भएर घाइते हुनुभएको थियो । सोही घटनामा घाइतु हुनु भएका नेता भण्डारीकी आमाको उपचारको क्रममा निधन भएको थियो ।
सम्बन्धित शीर्षकहरु
