काठमाडौं । वैदेशिक रोजगारीमा गएका नेपालीहरुका लागि प्राथमिक सेयर निष्काशनमा १० प्रतिशत आरक्षण दिने व्यवस्था लागू भएको छ ।

धितोपत्र बोर्डले आज धितोपत्र निष्कासन तथा बाँटफाँट (छैठौं संशोधन) निर्देशिका २०७९ लागु गर्दै आरक्षणको व्यवस्था कार्यान्वयनमा ल्याएको हो । सरकारले चालु आर्थिक बर्षको बजेटमा नै यो कार्यक्रम घोषणा गरेको थियो ।

अब संगठित संस्थाले सार्वजनिक निष्कासन गरिने सेयरको १० प्रतिशत श्रम स्वीकृति लिएर वैदेशिक रोजगारीमा गएका नेपालीहरुका लागि छुट्याउने पर्नेछ । यसरी छुट्याइएको सेयर निष्कासन तथा बिक्री प्रबन्धकले सर्वसाधारणका लागि निष्कासन गर्नुअगावै १५ दिनको अवधि तोकी आह्वानपत्र प्रकाशित गर्नुपर्ने व्यवस्था गरिएको छ ।

लगानीकर्ताले सेयरमा आवेदन दिँदा बोर्डबाट धितोपत्र खरीद दरखास्त संकलन सम्बन्धी कार्य गर्न अनुमति प्राप्त आस्वा सदस्य बैंक वा वित्तीय संस्थामा रहेको विप्रेषण बचत खाता मार्फत भुक्तानी गर्नु पर्ने छ ।

यसरी आवेदन दिन बचत खातामा पछिल्लो ६ महिनामा कम्तिमा ५० हजार नेपाली रुपैयाँ सम्बन्धित व्यक्तिले आफू रोजगार रहेको मुलुकबाट जम्मा गर्नुपर्ने व्यवस्था बोर्डले गरेको छ । यसरी आवेदन दिएकाहरुले सर्वसाधारणका लागि जारी गरेको आईपीओ भने भर्न पाउने छैनन् ।