Aafno Khabar
sanima bank

बालिका हत्या प्रकरण : प्रहरी र स्थानीयबीच झडप, दुई प्रहरीसहित दर्जनौँ घाइते

  • मोहन विष्ट
  • July 27, 2018 प्रकाशित

कञ्चनपुरको भीमदत्त नगरपालिका–२ महुलिया उल्टाखामकी १३ वर्षीया निर्मला पन्तको उखुबारीमा बलात्कारपछि हत्या गरेको विषयलाई लिएर स्थानीय र प्रहरीबीच झडप भएको छ । स्थानीयले भीमदत्त नगरपालिकाको मुल गेटमा दिनभर टायर बालेर प्रर्दशन गर्दै भित्र जान खोजेका थिए । त्यो भीड रोक्न खोज्दा प्रहरी र स्थानीयबीच झडप भएको हो । झडपका क्रममा दुई प्रहरी सहित दर्जनौँ स्थानीय घाइते भए ।

दिउँसो १ बजेदेखि नगरपालिकाको मुल गेटमा प्रर्दशन गरिरहेका आन्दोलनकारीलाई प्रहरीले ५ घण्टापछि बलप्रयोग गरी तितरवितर पारेको थियो । आक्रोशित आन्दोलनकारीले प्रहरीलाई लक्षित गरी ढुंगा प्रहार गर्दा दुई जना प्रहरीसमेत घाइते भए । जिल्ला प्रहरी कार्यालय कञ्चनपुरका प्रहरी प्रवक्ता ज्ञानबहादुर सेठीका अनुसार प्रहरी हवल्दार केशव दत्त भट्ट र जवान दान सिह धामी घाइते छन् ।

आन्दोलनकारीतर्फ भने दर्जनौँ घाइते भएका छन् । प्रहरीले भीड तितरवितर पार्न दर्जनौँ सेल आश्रुग्यास प्रहार गरेको थियो । भागदौड मच्चिदा र प्रहरीले लाठीचार्जबाट दर्जनौँ स्थानीय घाइते हुन पुगेका हुन् । घाइते दुवै प्रहरीको महाकाली अञ्चल अस्पतालमा उपचार भइरहेको छ ।

यस्तै, प्रहरीले एक पुरूषसहित पाँच जना महिलालाई नियन्त्रणमा लिएको छ । घटनास्थलमा प्रहरी बिट राख्नुपर्ने, दोषिलाई कारबाही गरिनुपर्नेलगायतका माग राख्दै स्थानीयले दिनभर महेन्द्रनगर बजारसमेत बन्द गराए । झण्डै दुई घण्टा पूर्व–पश्चिम महेन्द्रराजमार्ग बन्द गराएका प्रर्दशनकारीले घटनाको सत्यतथ्य छानबिन नहुञ्जेल आन्दोलन जारी राख्ने चेतावनी दिए । मृतक निर्मलाको शव पोष्टमाष्टका लागि महाकाली अञ्चल अस्पतालमा राखिएको छ । दोषिलाई कारबाही नभएसम्म शव नबुझ्ने आफन्त र स्थानीयको अडान छ ।

शुक्रबार बिहान निम्बुखेला खोला सडकमा निर्मलाको साइकल, कापी र अम्बा फेला पर्नुका साथै स्थानीयले खोला छेवैको उखुबारीमा शव फेला पारेका थिए । शव फेला परेपछि स्थानीयले तत्कालै प्रहरीलाई खबर गरेका थिए । मृतक निर्मलाका साथी रोशनी बमले दिउँसो करिब ११ः१५ बजे निर्मला घरबाट आफ्नो घर आएको बताइन् । ‘दुवैले होमवर्क गरेस सक्यौँ र मैले उनलाई अब्बा दिएर घर पठाएको थिएँ,’ ‘रोशनी बमले भनिन्,‘आज उनी मृत अवस्थामा फेला परेको कुरा सुन्दा डर लागिरहेको छ ।’

जिल्ला प्रहरी कार्यालय कञ्चनपुर बलात्कारपछि हत्याको विषयमा अनुसन्धान भइरहेको जनाएको छ । कञ्चनपुरका प्रहरी प्रमुख दिल्लीराज विष्टले घटनाको सुक्ष्म अनुसन्धान गरिरहेको बताए । ‘यो घटनाको अनुसन्धान भइरहेको छ, ‘कञ्चनपुर प्रहरी प्रमुख विष्टले भने,‘घटनाको अनुसन्धान गरेर सार्वजनिक गछौँ ।’ अपराधीलाई कुनैपनि हालतमा उन्मुक्ति नपाउने कञ्चनपुर प्रहरी प्रमुख विष्टले बताए ।

घटनाका सम्लग्न भएको भन्दै एक युवक पक्राउ परेका छन्, तर प्रहरीले ति युवकको नाम सार्वजनिक गरेको छैन । स्थानीयले घटनाका दोषिलाई जन्मकैदको माग गरेका छन् । उक्त घटना स्थलमा प्रहरी गस्तीको समेत माग राखे । लागुऔषध सेवन गरी सडक छेउँछाउँ बस्ने युवाहरुबाट हत्या भएको हुनसक्ने स्थानीयको आंशका छ । सुरक्षा सम्बेदनशिलतालाई ख्याल गरी त्यस क्षेत्रमा वाक्लो संख्यामा सुरक्षाकर्मी परिचालन गरिएको छ ।